Aloña Mendi elkarteko Julen Pedregal Aranzabal igerilari oñatiarra Espainiako Infantil Mailako Igeriketa Txapelketan egon da pasa den asteburu honetan, Sabadellen (Bartzelona, Katalunia), eta emaitza onak lortu ditu egindako proba guztietan. Hain zuzen ere, bizkar estiloko hiru distantziako probetan hartu du parte eta hiruretan ondu ditu aurretik zituen markak: 50 metroko distantzian, 100 metrokoan eta 200 metrokoan. Azken horretan, gainera, zortzigarren postua lortu du bere adinekoen artean.
Igeriketa saileko ordezkarien esanetan, sailkatzeko izan behar ziren gutxieneko denborak lortzea bereziki zaila zen aurten, "eta parte hartu ahal izatea negu osoan zehar egindako esfortzu luzearen emaitza izan da". Ondo merezitako atsedenaren ostean, uztailean Las Palmasen egingo diren udako Espainiako Txapelketetarako prestatzen hasiko da, dagoeneko sailkatuta baiago.
