Artzainari omenez Nestor Basterretxeak egin eta Urrintxon dagoen eskulturak eta San Martingo ermitak mantenu falta dutela salatu du EAJk prentsa ohar bidez. "Bi toki horiek ez dute behar bezalako zaintzarik eta mantentze-lanik jasotzen", diote. "Duela urtebete baino gehiago eskultura zaintzea eskatu bazen ere, ez da ezer egin horri buruz. Gauza bera gertatzen da San Martin ermitarekin, pintadaz estalita jarraitzen baitu, garbitu gabe", dio Amaia Erostarbe bozeramaile jeltzaleak oharrean.
Talde jeltzaleak adierazi duenez, udalerriko beste leku batzuetan "pintaketak garbitzea oraindik ere egiteke" dago eta kentzeko eskatzen dio Udal Gobernuari: "Berehala jardun dezala pintadak ezabatzeko, egungo paralisia eta utzikeria gainditzeko, eta eskultura eta ermita kontserbatzeko eta mantentzeko lanak behingoz abian jartzeko, udalerriko espazioak egoera onean mantentzen direla eta gure tokiko ondarea errespetatzen dela bermatzeko".