"Gaztetxeetako berotasunean sortzen den girorako aproposa den zuzeneko bortitza, zikina, azkarra eta izerditan blai amaitzen den horietakoa prestatu dugu", diote Hiru Haundiak taldeko kideak gaur Antixenan egingo duten kontzertuaz galdetuta.
Hiru Haundiak taldearen Hamaika arrazoi izeneko diskoak hamar abesti ditu, eta horien hitzak kritika sozialetik eta minetik daudela idatzita diote. Kanta horiek aurkeztuko dituzte, hain zuzen ere, zapatuko kontzertuan. Kolaborazio bakarren bat ere izango dute: "Taula gainera asko estimatzen eta maite dugun pertsona bat igoko da azken diskoan sortu dugun abesti kuttunetako bat gurekin abestera; berezia izango da". Aurreratu dute beste pare bat kontzertu ia lotuta dituztela udaberrirako, eta maiatzean, adibidez, Bergarako kartzela zaharrean joko dutela.
Eurez gain, bestalde, Naizpresidente taldeak ere joko du gaur gaztetxean. Sarrera zortzi euro da; murriztua, hiru euro.