19 eta 48 urte arteko bost gizonezko atxilotu zituzten atzo, larunbata, Oñatiko enpresa batean lapurreta egiteagatik.
Ertzaintzatik azaldu dutenez, eguerdian poliziak Oñatiko enpresa batera joateko eskaria jaso zuten, zenbait pertsona bertako instalazioetatik materiala lapurtzen ari zirela esanaz. Bertaratutako patruilek ibilgailu bat ikusi zuten lantegitik urruntzen. Autoa geldiaraztean barruan zeuden bost bidaiariak identifikatu zituzten; Ertzaintzaren arabera, guztiak gizonezkoak eta espainiar nazionalitatekoak. Auto barruan metalezko hainbat pieza eta altzairu herdoilgaitzezko objektu batzuk aurkitu zituzten agenteek, baita lapurretak egiteko erabiltzeko moduko erremintaren bat edo beste ere. Horren aurrean, susmagarriak atxilotu egin zituzten indarrez lapurreta egitea leporatuta.
Gero, enpresako segurtasun-kameretako irudien bidez ikusi ahal izan zuten pertsona horiek perimetroko hesia hautsi zutela eta autoan aurkitu zuten materiala lapurtzera sartu zirela barrura.
Ertzaintzako iturriek adierazi dute atxilotuek polizia-aurrekari ugari dituztela batez ere ondarearen aurkako delituengatik. Dagozkion polizia-eginbideak amaitu ondoren jarriko dituzte epailearen eskuetan.