Oñatiko Udalako talde jeltzaleak salatu du ohar bidez EH Bilduren Udal Gobernuak "ekintza falta" duela etxebizitzaren gaiari dagokionez. Diote "planak baino" ez dituela Udal Gobernuak, "ez dela lanean hasi, ez aurrekontuetan, ez fiskalitatearen bidez, eta ez direla benetako konponbideak planteatzen ari udalerriko etxebizitza eskaera gero eta handiagoari irtenbidea emateko. Planak eta plan gehiago besterik ez dago".
Etxebizitza eskaintzaren "arazo larria" dagoela Oñatin ikusten dute jeltzaleek: "Malgutasuna eta neurri eraginkorrak behar ditugu eraikuntza, erosketa eta alokairua sustatzeko", dio jeltzaleen udal bozeramaile Amaia Erostarbe Letamendik oharrean. Horri lotuta, eurek egindako proposamenak ekarri dituzte gogora: "hobari fiskalak zabaltzea eta prezio eskuragarriko baldintzak aplikatzea ekimen horiekin bat egiten duten jabeentzat". Zehazki, "merkatu librean alokairuko etxebizitzetarako OHZren %50eko hobaria ematea, eta Eraikuntza, Instalazio eta Obren gaineko Zerga (EIOZ) doitzea, alokairura bideratutako etxebizitzen erreformak errazteko". Etxebizitza berriak egiteko, berriz, "Obispo Otadui –Kurtideria– bezalako lurrak erosteko aukera planteatu du, non 60 etxebizitza arte eraiki daitezkeen". Italde sustatzailearekin batera "etxebizitzen eraikuntza gidatzea eta bultzatzea" ere proposatzen du EAJk, "Kurtzekuan gutxienez hamabi etxebizitza eraikitzeko aukera baitu, legez dagokion eraikigarritasun ehunekoan oinarrituta".
Proposamen horiek ez zirela onartu aurtengo aurrekontuan sartzeko gogorarazi dute eta lanean jarraituko dutela gaineratu, "horiek inplementatzeko, udalerriko etxebizitza krisiari aurre egiteko funtsezkoak" direla iritzita. "Premiazkoa da Oñatiko etxebizitzaren arazoari irtenbidea emateko jardutea".