Denboraldi ezin hobea egiten ari dira senior mailako neskak Euskadiko txapelketan. Iazko denboraldian igoera lortu ostean, Euskadiko talde onenen artean daudela erakutsi dute Pablo Garciaren jokalariek, eta hori bera berretsi gura dute egubakoitzean, 20:00etan hasita, Elgoibarren aurkako partiduan. Azkenengo bi partiduak irabazita, bolada onean daudela jasoko dute elgoibartarren bisita, Zubikoan.
Taldea, gogotsu
Seigarren daude sailkapenean oñatiarrak, eta laugarren, berriz, egubakoitzean aurkari izango duten taldea. Sailkapeneko lehenengoak zuzenean lortuko du igoera faserako txartela; hurrengo lau taldeek, berriz, txapelketa txiki bat jokatu beharko dute, igoera faserako bigarren txartela lortzeko. Hori horrela, "partidu garrantzitsua" dela dio taldeko kapitain Amaia Kortabarriak: "Gure hasierako helburua maila mantentzea zen, eta, hori lortuta, taldeak hazten jarraitzea da asmoa. Joaneko partidua galdu egin genuen, eta ez zen izan gure egunik onena. Hortaz, jokalari guztiak gogotsu eta motibatuta gaude horri buelta eman eta partidu ona egiteko; are gehiago, etxean jokatuta".
Zaleen babesaren beharra
Ezohiko ordutegian jokatuko dute txantxikuarrek Elgoibarren aurkako partidua, eta, hortaz, "Zubikoa jendez lepo betetzea" eskatu du klubak. "Taldeak denboraldian izango duen partidu garrantzitsuenetako bat jokatuko du, eta taldeari merezi duen bultzada ematera animatzen zaituztegu!", gehitu dute.