Herritar guztiei irekitako gonbidapena da. Norberarendako erreferentziazko emakumea zein den identifikatu –senidea, laguna, eskubide sozialen alde aritutakoa, kirolaria, irakaslea, dendaria, musikaria, zaintzailea...– eta hori jakinaraztea da planteamendua.
Parte hartzeko argazkiak bidali behar dira, eta hiru modu daude horretarako: emakume horren argazkiaren kopia bat edo originala posta elektronikoz bidaltzea, argazkikoa nor den adieraziz eta zergatik aukeratu den arrazoituz; argazkia herriko eraikin ezberdinetan jarriko dituzten ontzietan sartzea –kultura etxean, Pake Lekun, Gaztelekuan, MUn, Lagun Lekun eta udaletxean–; edo posta elektronikoz helbide honetara bidaltzea, gero eurek, antolatzaileek, inprimatu dezaten: saltserakOEE@gmail.com. Otsailaren 28ra arte dago aukera argazkiak helarazteko.
Herriko hiru ikastetxeak ere batu dira ekimenera. Horietan ere landuko dute gaia eta batzen dituzten argazkiak gainerakoekin batera jarriko dituzte ikusgai.
Azoka eta manifestazioa
Emakume erreferenteen argazki erakusketaz gain, artisauen azoka eta manifestazioa ere antolatu dituzte Emakumeen Nazioarteko Eguna ospatzeko. Herriko emakume artisauen azoka martxoaren 1ean egingo dute, eta manifestazioa Martxoaren 8an.
Hurrengo bilera irekia zapatuan izango da, otsailak 21, 11:00etan, gaztetxean.