Oñatiko plaza ikusten den dekoratua atzean dutela, Oñatiko Inauteriez arituko dira Potx eta Lotx ikuskizun horretan, gaztetxoei egitasmo horren historia azaltzeko. Bertan parte hartzen duten pertsonaiak ezagutzea ere badu helburu ikuskizunak, eta, hala, oholtza gainean izango dira pailazoekin batera kondea, kondesa, borreroak, pregoilaria, hartza, zaindaria, txokolateroak, umea eta natura elementuak.
Inauteri Txikia
Ikuskizun horretan parte hartu dute, gainera, Lehen Hezkuntzako bosgarren eta seigarren mailetako ikasle batzuek. Hain zuzen ere, maila horietako ikasleak ibiliko dira ikuskizunaren aurretik, kalez kale. 15:00etan elkartuko dira, Olaitturrin, eta erdiguneko kaleak zeharkatuko dituzte kalejiran. Oñatiko Inauterietako pertsonaiak ere eurekin ibiliko dira kalez kale, eta, plazara heltzen direnean, bi pieza eta azken dantza dantzatuko dituzte.