"Familia osoari" zuzendutako kontzertua emango du domekan Oñatiko Musika Bandak. Espazioko emozioak izenburupean, "unibertsoaren handitasuna, abentura eta misterioaren emozioak" bizitzeko aukera eman gura diote entzuleari musikaren bitartez. Horretarako, espazioarekin eta zientzia-fikzioarekin lotutako honako lanak biltzen ditu programak: Cassiopeia, Apollo 11, Stratosphere, Guardians of the Galaxy, A Space Suite, Orbital eta Out of Space.
Musika Bandatik adierazi dutenez, kontzertua "musika-esperientzia bat baino gehiago" izango da: "Irudimena pizteko, familian gozatzeko eta unibertsoaren soinuen bidez, emozioz betetzeko gonbidapena da". Kontzerturako gonbidapenak txokolateixan lortu daitezke.
Iratxe Mugarza omenduko da
Kontzertuarekin batera, urrezko pina emango diote Musika Bandako kide den Iratxe Mugarzari. Honekin, 25 urteko ibilbidearen aitortza egin nahi zaio: "Urte hauetan egindako ekarpena eta konpromisoa eskertzeko ekitaldi berezia izango da".