Bateria-jazz Interpretazioa ikasketak egiten ari da Altube eta gradu amaierako proiektua da Neguko izarrak. Ordubete inguruko errezitaldia egin dute gaur eguerdian Oñatiko gaztelekuan. Altubek alboan izan ditu Jokin Barriola (baxua), Jon Gomez (pianoa), Jose Garcia (gitarra), Peio Martinez (saxoa), Aimar Palacios (tronpeta) eta Malentxo Zeberio (ahotsa).
Antolatzaileek prestatutako aulki ia guztiak bete egin dira eta honela esan die Altubek bertaratutakoei: "Kontzertua proiektu kontzeptual bat da; naturako elementuetan oinarritzen da eta bizitzaren zikloa hartzen du aintzat".
Zazpi bat kanturekin osatutako emanaldia egin dute. Xabier Leteren Izarren hautsa kantuaren konponketa bat eskaini dute hasieran eta Mikel Laboaren Negu hurbilak abestiaren konponketa bat amaitzeko, biak jazz estilora gerturatuak. Tartean joan dira, besteak beste, Ura, Haizea, eta Sua. –Lurra ez dute jo txalapartariak falta zirelako–.
Emanaldiaren amaieran diskoa ipini dute salgai. Irailean grabatu zuten Fredi Pelaezekin Beasaingo Pottoko estudioan eta eskuragarri dago.