Puzgarriak, ohe elastikoak, zezen mekanikoa, trena, era askotako bideojokoak, mahai jolasak, eskulanak egiteko txokoa... Gaur Zubikoako kantxako ateak ireki dituztenean (11:00) gabonetako haurren parkean batu diren gazteek askotariko aukerak izan dituzte, eta eguerdira bitartean gustora ibili dira, izan ere, neska-mutikoak eta gurasoak bai, batu dira, baina ez da jendetzarik pilatu, eta gazteak batera eta bestera ibili ahal izan dira ilara luzeak sortu gabe. Arratsaldean 16:30ean zabalduko dituzte ateak, eta baliteke orduan jende gehiago egotea –19:30ak arte– eta bihar, zapatua, ordutegi berdinean izango da haur parkea zabalik.