Aloña Mendik eta Irauli Bostekok sei puntuko aldea zuten sailkapenean, elkarren kontrako norgehiagoka hasi aurretik. Diferentzia horrek lehia lasaia izango zela pentsarazi zezakeen arren, guztiz kontrakoa gertatu zen, urteko azken partiduan.
Oñatiarrak hasi ziren agintzen lehen zatian, 12-3ko aldera lortu arte. Bada, txakalaldi bat izan zuten azken hamar minutuetan. Erasoan egindako jaurtiketa txar batzuk eta atezainaren geldiketa batzuk, lehen zatian gol gehiago ez sartzea eragin zuen. Kontrara, Irauli Bostekok aurkitu zuen Aloñaren atea zulatzeko bidea, eta sei gol egin zituen jarraian. Atsedenean 12-9 erakusten zuen markagailuak.
Bigarrenaren hasiera, antzekoa
Bigarren zatiaren hasiera oso antzekoa izan zen. Donostiarrek are gehiago estutu zuten markagailua 13-12 jartzeraino; eta aurretik ipintzea ere lortu zuten: 45. minutuan, 15-16.
Bada, azken ordu laurdenean, Aloñako jokalariak berpiztu egin ziren, eta kantxan gogor eraginez, lehia menpean hartzea lortu zuten, berriro ere. Donostiarrei indarrak bukatu zitzaizkien 17. golarekin, eta oñatiarrek 21 sartu zituzten.