Ginkana eran antolatu dute zapatuan Oñatin egingo den RallyKlik! proba. 10:00etan elkartuko dira parte hartuko duten ibilgailuak unibertsitatearen aurrean eta han jasoko dute eginbeharra. "Bai edo bai joan beharreko leku batzuk emango zaizkie eta gune bakoitzean zer egin behar duten azalduko. Adibidez, Arantzazura joan eta han objektu gorri batekin argazkia atera. Gune bakoitzean erronka bat bete beharko dute eta argazki bat bidali hori egin dutela erakusteko. Hiru ordu izango dituzte esandako ibilbidea egin eta erronkak burutzeko. Denbora barruan ibilbidea kilometro gutxien eginda bukatzen duen autoak irabaziko du proba", azaldu du Emakumeak Automobilismoan elkarteko kide den Oihane Urangak.
Proban parte hartuko duten autoak ez dira zertan rallyetan parte hartzen dutenak izan behar, kaleko autoekin ere har daiteke parte, "eta auto barruan kabitzen diren adina pertsona joan daitezke: bakarrik, bizpahiru lagun, familia osoa... Disfrutatzeko proba bat da". Oraingoz hamar autok eman dute izena eta azken ordukorik balego, helbide honetara idatzita batu daiteke zapatuko proba honetara: emakumeakautomobilismoan@
Emakumeak Automobilismoan elkartea, Eme, emakumeak kirol horretan ikustarazteko eta rallyetan parte hartu ezin dutenak kirol horretaz gozatzeko aukera emateko sortu zuten duela pare bat urte pasa. Iazko ekainean. adibidez, San Migel Rallysprinta automobilismo proba antolatu zuten Elgoibar eta Etxebarri artean, zortzi urteko etenaren ostean.