Olentzero eta Mari Domingiren tamaina handiko irudiak jarri dituzte ikusgai Zubillagan, auzoaren ikur bihurtu den harlanduaren ondoan.
Joan den urteko Gabonetan sortu zitzaien ideia auzotarrei, eta urte guztian lantzen egon ostean, zapatuan bukatu zituzten lanak. Gizakiaren tamainakoak diren bi irudiak Xabi Mendizabalek egin ditu: "Erraldoiekin moduan, Olentzero eta Mari Domingieren irudien moldeak buztinarekin atera ditut, eta gorpuztu gero. Zuntza eta erretxina dira erabilitako materialak eta besoak eta hankak egurrezkoak dira, artikulatuak".
Irudiak Mendizabalek jantzi ditu, baina auzotarrak ibili dira jantziak egiten, josten. Txabola bera ere auzotarrek egin dute, auzolanean; baita barruko dekorazioa ere.
Urtarrilaren hasierara arte egongo dira ikusgai.
