Duela 45 urte abiatu zen lehenengo Korrika Oñatiko unibertsitatetik, eta gaur, zapatua, hasiera hori gogora ekarri eta antolakuntza lanetan aritu zirenak omendu dituzte toki berean. Ehun lagun baino gehiago batu dira bertan.
Besteak beste, Urtsa Errazti, Joseba Kanpo, Enrike Ibabe, Josepe Zuazo eta Alvaro Gurrea sortzaileek jaso dute aitortza. Edizio hartan protagonista izandakoak ere ekarri dituzte gogora: Xabier Amuriza –Korrikako lehendabiziko kantaren sortzailea–, Remigio Mendiburu –lekukoaren egilea–, eta Eli Galdos eta Jose Maria Satrustegi –0 kilometroa korritu zutenak–.
Ekitaldian omenduak izan direnen artean, Urtsa Erraztik hartu du hitza. Garai artan berarekin lanean aritu zirenak izan ditu gogoan, eta, etorkizunera begira, euskarak Korrikaren beharrik ez izatea nahiko lukeela adierazi du. "Zoritxarrez, Korrika aldarrikatzailea egiteko beharra dago oraindik", gehitu du. Xabier Amurizak ere, lehen ekitaldi hartako koplak kantatu ditu ekitaldiaren hasieran.
45 urte eta aldarrikapen bera
Ekitaldiaren beste helburua aldarrikapena izan da. "Korrika ez da jai-giroa soilik, aldarrikapen giroa ere bada; horretaz jabetzeko, Korrika bakoitzaren leloei erreparatzea baino ez dago", adierazi du Ane Elordik, Korrikako arduradunak. Horregatik, 24. korrikaren atarian, eta 45 urte eta 23 Korrika geroago, AEKk "Korrika antolatzeko beharrizan berberak" dituela dio Elordik: "Euskararen aldeko kontzientzia suspertzea eta dirua biltzea AEKren eguneroko lana indartzeko".
AEKren Nazio Kontseiluko kide diren Aize Otaño Lizarraldek eta Xabi Gartzia Castellek ere hartu dute hitza. 1980an Korrika hura egiteko beharrizanak azaldu dituzte, eta, hauek ere, ordutik hona gauza askok aldatu gabe jarraitzen dutela esan dute: "1980an, euskaltzaletasunak euskarari beste pizkunde bat eman zionean, alfabetatzearen eta euskalduntzearen premia hauspotzeko eta antolatzeko bultzada, urrats logikoa eta naturala izan zen. Berriki esan dugu 24, korrikan aldarrikatu nahi dugula euskara guztiontzako aterpe irekia eta erosoa dela; eta, nola ez, presa dugula pizkunde berri bat abiatzeko, Euskal Herri euskalduna lortzeari begira".
Helduen euskalduntzean begirada
Otañok eta Gatziak garai hartatik "aurrera pausoak eman direla" aitortu duten arren, garai hartako premia bera dagoela adierazi dute helduen euskalduntzeari begira: "Helduen euskalduntzea lehen lerrora ekartzeak esan nahi du botere publikoek gisa horretako aitortza egitea". Horretarako, hiru eskari egin dizkiete administrazio nagusietako arduradun politikoei; bata, "Euskal Herri osoa hartuko duen egitura egonkor eta iraunkor bakarra" sortzea, bigarrena, doakotasuneranzko bidean urrats sendoagoak emateko konpromisoa, eta, hirugarrena, euskara ezagutzeko beharra sustatzea, "erdaldun elebakarrei argi sentiarazteko euskara ikastea gero eta beharrezkoagoa gertatuko zaiela".
Ekitaldia amaitzeko, aurreskua dantzatu diete omenduei eta euren senideei, eta, horrekin batera, AEK-Korrikako familia argazkia atera dute.
