Azken asteetan Oñatiko kaleetan beldurra eta kezka nabarmen handitu direla diote jeltzaleek prentsara bidalitako oharrean. Diote lapurretak, lapurreta saiakerak eta "egoera susmagarriak" egon direla, ibilgailu ezezagunak kaleetan eta poliziari egindako alerta-dei ugari. Diote herritarrek bizi duten "errealitatearen isla" dela hori eta ingurune segurua bermatzeko betebeharra gobernu taldeari dagokiola: "Hala ere, erreakzio eta neurri argi faltak babesgabetasun sentsazio gero eta handiagoa sortzen ari da".
Jeltzaleek gehitu dute "arazoa politikoa" dela: "Aspaldidanik, EH Bilduk jarrera anbiguoa du, argi eta garbi kontrakoa ez bada ere, Ertzaintzarekiko. Jarrera horren ondorioz, gobernatzen duen udalerrietan ez dago polizia-eredu zehatzik. Ertzaintzari helarazitako mesfidantza bizikidetzan laguntzen ez duten mezu publikoetan eta hartzen ez diren erabakietan ere islatu da, lankidetza estuan aritu beharko luketen erakundeen arteko koordinazioa zailduz". Bizilagunek ez dutela erantzunik jasotzen ere badio EAJk oharrean: "Herritarrek herritarrek helarazitako eskaerei — poliziaren presentzia handiagoa, erakundeen arteko koordinazio hobea eta informazioaren argitasuna — ez zaie erantzuten oraindik. Hori guztia are larriagoa da kontuan hartzen bada zaintza-kamerak ez daudela erabilgarri eta gauean ez dagoela udaltzaingoaren zerbitzurik".
Gaineratu dute herritarrak ari direla gobernuaren "eraginkortasunik eza" horren ondorioak jasaten eta "kudeaketa hobea merezi" dutela. Hala, Ttalde jeltzaleak "premiaz jokatzeko, neurri argiak hartzeko eta Ertzaintzarekin, Udaltzaingoarekin eta gainerako segurtasun-kidegoekin koordinazio eraginkorra berrezartzeko" eskatu dio Udal Gobernuari. Baita "zaintza-sistemen funtzionamendua bermatzeko eta gaur egun ez dagoen ordutegietan udaltzaingoaren presentzia" berreskuratzea.