Ez gero orain baizik izeneko ekitaldi instituzionala antolatu du biharko AEK-k, Oñati Sancti Spiritus Unibertsitatean; lehenengo Korrika abiatu zen lekuan, hain zuzen. Hitzordua 12:00etarako deitu dute, eta, urteurrena gogoratzearekin batera, Korrikaren sortzaileei eta lehendabiziko Korrikan parte hartu zuten kideei omenaldia egingo diete; antolatzaileek aurreratu dutenez, ehundik gora gonbidapen zabaldu dituzte. Biharko eguna 24. Korrikaren bueltan AEK-k ondutako mezua helarazteko ere baliatuko dute.
Izan ere, Oñatin hasi zen, 1980ko azaroaren 29an, Korrikaren lehen edizioa. Udalbatzako kide zen Carlos Agirrebengoa, aurreko urteko hauteskundeetan EAJko zerrendan independente gisa aurkeztu zena. Haren esanetan, Oñatin hastearen arrazoia Arantzazuren garrantzia izan zen: "Antolatzaileek proposamena egin, eta onartu egin genuen; esango nuke euskararen egoeran Arantzazu historikoki, garai txarrenetan barne, erreferente izan delako gura zutela hemendik abiatzea".
Gogoan duenez, "ilunkera euritsuan" irten ziren unibertsitatetik Kale Berrira bidean, "jendez lepo" zegoen plazatik igarota. Ekitaldi berritzailea zenez, bazeuzkaten hainbat zalantza: "Esaterako, ez genekien noiz arte egin behar genuen antxintxika".
Eli Galdos jeltzalea zen orduan Oñatiko alkatea, eta hark estreinatu zuen testigua. Haren alaba Ainhoak gogoan du ze egun garrantzitsu izan zen hura aitarendako: "Oso hunkituta zegoen. Klandestinitatean euskara ikasitakoak gara, ikastolen sorreren garaikoak. Euskarak beti izan du oso pisu handia gurean, gurasoak biak izan dira euskararen aldekoak, eta aita oso harro zegoen lehen Korrika Oñatin hasteaz. Zero kilometroko petoa jantzi zuen egun hartan, eta argazki hori oraindik haren logelan dago".
Udal taldeari lehenengo kilometroan egokitu zitzaion testigua eramatea, eta herriko beste hainbat entitatek ere eraman zuten ondoren; tartean, Aloña Mendik eta Txantxiku Ikastolak.
MARTXOAREN 19TIK 29RA OSPATUKO DA 24. KORRIKA, 'EUSKARA GARA' LELOPEAN
Guztiontzako aterpe
Ordutik beste 22 Korrika izan dira, eta jada 24.era goaz. Joan den azaroaren 13an egin zuten aurkezpen-ekitaldia, Gasteizko Izaskun Arrue Kulturgunean. AEKren Nazio Kontseiluko kide Maialen Begiristainek eta Lurdes Etxezarretak hartu zuten hitza bertan. Begiristainek azpimarratu zuen euskara herritar guzti-guztiontzat aterpe ireki eta erosoa dela, Korrikak ondo azaleratzen duenez: “Berdin da zer jatorri, zein azal-kolore, euskararen inguruko nolako ezagutza... Garrantzitsuena da guztiontzako lekua dagoela".
Etxezarretak, berriz, hiru mezu helarazi zizkion jendarteari. Batetik, euskara ardatz duen komunitatean eroso eta aske bizitzeko nahia: "Euskal Herri euskalduna, feminista, antiarrazista eta goxoa izango delako gurea". Bigarrenik, presa: "Helburu dugun Euskal Herria lortzeko, ezin dugu ezer geroko utzi; orain da unea". Hirugarren mezua instituzioei helarazi zien, euskararen ekosistema babestu eta indartzeko "hizkuntza-politika ausarta eta sendoaren beharra" dagoela aipatuta.
Atharratzetik Bilbora
Euskara gara lelopean, euskararen herria zeharkatuko du 24. Korrikak martxoaren 19tik 29ra, Atharratzetik Bilbora. Oraindik ez dituzte ibilbidearen zehaztasunak jakinarazi; bai, ordea, omendua Errigora izango dela. Korrikaren arduradun Ane Elordi Alburquerquek adierazi legez, "Nafarroan, euskara ofiziala ez den eremuetan, euskalduntzean egiten duen esfortzua aintzatzeko era da, baita etorkizunerakoan hauspoa emateko ere".
Laguntzaile kanpaina ere abian jarri dute: korrika.eus-en sartu eta 15 euroko ekarpena eginda, edizioko pina eta txartel birtuala jaso, eta hainbat abantaila izaten dituzte laguntzaileek; tartean, astero zozketetan parte hartzea eta deskontuak AEKren zerbitzuetan. Bestalde, eskuragarri dago sakelakoetarako Korrika aplikazioa. Hiriburuetako Korrika dendak eta online denda ere irekita daude, 24. aldiko arropa, bizkarrekoa eta bestelako osagarriak erosteko.
Herrietako Korrika batzordeak datorren urtea hastearekin bat jarriko dira martxan.
'Kaka' antzezlanaren bi hitzordu
Korrika Kulturalean taularatzeko AEK-Korrikako II. Kultur Sorkuntza Beka irabazi zuen Xanti Agirrezabalaren eta Erika Olaizolaren Kaka antzezlanak. Pare bat debagoiendarrek ere hartzen dute parte: Kepa Errasti gidoilariak eta Mikel Laskurain aktoreak. Autoreen esanetan, "norbanako, kolektibo edo herri gisa batzen gaituen baina ezkutatzen dugun horren guztiaren azaleratze-festa da Kaka". Hain tabua den gai hori aitzakiatzat hartuta, beste hainbat tabu eta konplexuz hitz egingo dute.
Joan den astean estreinatu zuten, Zumaian, aurkezpen biraren abiapuntu bezala. Hain zuzen ere, martxoa bukatu arte, han eta hemen taularatuko dute obra; tartean, Arrasateko Amaia udal antzokian, martxoaren 7an, 19:30ean, eta Aretxabaletako Arkupe antzokian, martxoaren 22an –ordua zehazteke dago–.