Urtean zehar 180 edo 200 bat aldiz abesten dute bi koroen artean, "beti ere musu-truk eta anonimoki" eta lan hori eskertzeko, urtero esker oneko oroigarri bana ematea pentsatu dute bi koruetako kideek. Domekan izango da lehen aitortza publiko hori, Santa Zezilia ospatzeko domekan izango den 12:00etako mezaren ostean.
Antonia Gomez eta Eduardo Korkostegi dira aurten omenduko dituztenak –iaz zuzendaria, Iñaxio Ibarrondo omendu zuten eta aurten, lehen aldiz, abeslariak–. Emakumezkoen korua beste hiru lagunekin batera sortu zuen Gomezek, eta Korkostegi, berriz, mutikotan batu zen gizonezkoen korura.
Parrokian obrak ari dira egiten eta meza agustindarren elizan izango da domekan ere, 12:00etan.