Gaur egun Oñatz dantza taldean dauden eta garai batean taldekide izan ziren dantzariekin ordu eta erdiko saioa dute prestatuta, herritarrei erakusteko. Denek batera egingo dituzten dantza batzuk entseatu dituzten arren, talde bakoitzak aukeratu du bere taldeak propio zein dantza egingo duen. Eta denak joango dira dantzari jantzita; hori bai, bakoitzak etxean dituen arropekin. Haurren Eguna egiten den moduan, plazaren zati batean hartuko du tokia talde bakoitzak, eta hantxe egingo du dantza, ez da eszenatokirik egongo. Zapatuan izango da 12:00etan Foruen enparantzan –eguraldi txarra bada, Zubikoako frontoian–.
Bazkari-txartelak salgai daude Txokolateixan, eta dantza saioaren ondoren, elkarrekin bazkalduko dute kiroldegian.