Liburuan datozen herritarrekin egon, elkarrizketatu eta argazkia atera die egileak, eta eurek kontatutako moduan jaso ditu testimonioak. "Euretako inork ez du gertaera modu linealean kontatu, eta liburuan ere horrela datoz; ez datoz kronologikoki, esaterako. Bestalde, ahozkotasunaren alde, estiloa aldatu gabe transkribatu ditut elkarrizketak; idatzita datoz, baina gertuko edo herriko erregistroan idatziak, ez hizkuntza akademikoan", azaldu du.
Atalka antolatu du liburua, elkarrizketatu bakoitza dator atal bakoitzean, eta kontakizun gehienetan zati ezberdinak bereizi ditu, "irakurterrazagoa izateko eta zatika irakurri gura izanez gero". Atera zizkien argazkiak, berriz, paper begetalean inprimatu ditu.
Liburua salgai
Liburua egiteko laguntza handia izan duela aitortu du Diaz de Tuestak, eta dio haiei eskerrak emateko ekitaldia ere izango dela aurkezpena: "Gertukoei, harremanak errazten lagundu didatenei, informazioa helarazi didatenei...". Liburua salgai egongo da aurkezpen ekitaldian; baita liburu-dendetan ere.
Aurkezpena egubakoitzean da, urriak 17, kultura etxeko erakusketa gelan, 19:00etan.
