Gaur eguerdian jokatu da elite mailako finala Donostiako Atano III.a pilotalekuan eta iazko txapeldunak garaitu dituzte Maddalen Etxegaraik eta Enara Gamindek. Hori horrela, Hiru Hiriburuak torneoko txapeldun berriak dira. 22-17 irabazi dute. Garaipen "epikoa" izan dela adierazi dute antolatzaileek.
Finalari neurria hartu eta euren onena eman ezinik, txapelak oso zail jarri zaizkie iazko irabazleei. Lan erditan 12-6 aurreratu dira; izan ere, oso deseroso hasi dira Etxegarai eta Gaminde. Baina oñatiarrak eta laukiztarrak ez dute euren buruarengan federik galdu. Hala, bigarren txanpa ikusgarria egin dute eta partida irauli ahal izan dute eta markagailua 17-16ra heldu da. Orduan, aurrelari oñatiarrak saketik falta bat egin du baina hurrengo bietan lehen pilotakadarekin zuzenean lortu du tantoa eta torneo horretako bere lehen txapela eskuratu du.
Irati Betegi aretxabaletarra ere txapeldun
Nabarmentzekoa da promesen mailan Irati Betegi aretxabaletarrak egindako lana. Olatz Insausti bikote kidearekin batera txapela jantzi du Ainize Arratibel eta Larraitz Galardiri 18-10 irabazita.
