Elite mailako finala igande eguerdian jokatuko dute, Donostiako Atano III.a pilotalekuan, eta nabarmentzekoa da promesen kategorian ere bailarako beste pilotari bat izango dela finalean: Irati Betegi aretxabaletarra.
ETBk emango du finala
Gasteizen jokatutako 35 partidatako maratoiaren eta Bilboko finalerdi ikusgarrien ostean Euskal Herriko klub guztietako 70 emakume pilotari aritu dira torneo honetan lehian–, domekan maila bakoitzeko bikoterik onenak erabakiko dituzte. Elite mailako finalean Zabaleta-Mendizabal, iazko garaileek, txapelaren defentsa egingo dute Etxegarai-Gaminderen aurka. Hau da, egungo Lau eta Erdiko txapelduna eta Binakako txapelduna elkarren aurka arituko dira finalean. "Hortik harago, Goiuri Zabaleta eta Enara Gaminde aurreko eta atzeko koadroetako erreferentzia nagusiak izan dira azkenaldian eta elkarren aurkako lehiek ikuskizun handia sortu izan dute", adierazi dute antolatzaileek aste barruan egindako aurkezpenean. Madalen Etxegarairendako berezia da Atanokoa moduko frontoi batean jokatzea: "Iaz beste final bat jokatzeko aukera izan nuen, eta Atano bezalako pilotaleku historiko bat beteta ikustea final batean... partida berezia da berez eta jendearen animoek bereziago egingo dute".