Joan den astean pareta zuriz margotu zuten pareta, egubakoitzean berriz, eta gaur, domeka, goizean elkartu dira hainbat herritar Palestinaren aldeko horma-irudia egiteko, Oñati-Palestina taldeak sare sozialen bitartez gonbidapena eginda. 80 bat lagun elkartu dira. Saihesbideko biribilguneko paretan egin dute horma-irudia eta hiru esaldi idatzi dituzte, Palestinako bandera margotuaz gain: "Erresistentzia aurrera", "Palestina aske" eta "Genozidioa gelditu". Ekintza egin bitartean ondotik pasa diren ibilgailu gehienek ere klaxona jo dute nolabaiteko elkartasuna adierazi guran.
San Migel eta Errosarixo jaietan ere egingo dira Palestinaren aldeko keinu gehiago. Gaur, egubakoitza, gauean egingo den nagusien danborradan, esaterako, Palestinako zapiekin aterako dira parte-hartzaileak. Txosna gunean Palestinako bandera bat egongo da jarrita jaiak irauten duten egunetan eta Herri Egunean, urriak 4, Sol Band talde palestinarrak joko du. Gazako musikariek herri palestinarraren erresistentziari emango diote ahotsa, folk doinuek lagunduta. Haren aurretik ekitaldi bat egingo da gune horretan. Hilaren 1ean, berriz, Erei taldeak antolatuta, Palestinako egungo egoera eta sustrai kultural eta musikalak ezagutzeko hitzaldi musikatua egongo da kultura etxean, Sol Band taldearekin.
Udaletxeko fatxadan ere eskegita dago bandera palestinarra.
