Pozik daude Hots abesbatzako kideak Varnako nazioarteko lehiaketan egindako lanarekin eta lortutako emaitzarekin, izan ere, hirugarren saria eskuratu dute. Hauxe esan du Aitor Biain-Bidarte zuzendariak: "Hirugarren sariarekin gatoz. Oso-oso pozik egindako lanarekin, oso esperientzia polita izan da lehiaketa. Maila oso altukoa, baina gu benetan pozik gaude egindako lanarekin. Gure aktuazioa oso-oso ondo joan zen. Esan ziguten musikalitate handiko taldea ginela eta soinu politarekin, eta egindako lana oso ona izan zela". Gaineratu du esan dietela aukeratutako programa ere "bikaina" izan dela lehiaketa baterako.
Lehiaketa atzo eta herenegun izan zen eta hainbat kontzertu eman dituzte Varnako hainbat tokitan. Gaur, denbora librea izan dute eta hondartzara joan eta turismoa egiteko aprobetxatu dute. Bihar itzuliko dira Oñatira.
