Maiatzaren 1 plazako iturria berritzeko lanak egiten dihardute azken asteotan, Oñatiko Udalak jakinarazi duenez. Petra enpresa ari da zeregin horretan, eta eginbeharren artean dira, besteak beste, gehiegizko morteroak kentzea, harria garbitzea eta iturriko eskultura –Aguadora izenekoa– txukuntzea. Hala ere, Udalak adierazi du ez direla urteotako lan bakarrak izan: "Maiatzaren 1a plazako iturria XIX. mende amaieran herrian jarri ziren zortzi iturri publiko historikoetako bat da. Zortzi horietatik bostek zati metalikoren bat dute, eta 2014an elementu metaliko horiek tratatu eta margotu egin ziren, herdoilduta baitzeuden. 2020an, berriz, Maiatzaren 1a plazako iturrian konponketa lanak egin ziren, ur-hodia urteetan hondatuta egon zelako".
Udalaren hitzetan, "ondare historiko-arkitektoniko handia" du Oñatik, eta Udalak "etengabeko konpromisoa" du ondarea babestu eta zaintzeko. "Herrigunean dauden iturriak dira horren adierazleetako bat. Udalak urte hasieratik hartu zuen iturrietan mantentze lanak egiten hasteko konpromisoa".