Oñatiko hilerriko zenbait kapera eta panteoi egokitu beharko dira gorpuen lurperatzeak egiten jarraitzeko, Udalak adierazi duenez, eta norberarena izango da horren ardura: "Kapera eta panteoi horietan ezingo da gorpurik lurperatu, egokitzapenak egin arte. Horren jakinarazpena ari dira jasotzen egunotan zenbait herritar". Zehazki, hilerri zaharrari eta lehen handitzean egindako zatiari eragiten dio neurriak, eta bakarrik panteoiaren gainetik 2x0,9 metroko zabalgunea ez duten hilobiei. Era berean, Udalak ohartarazi du lan horiek egin aurretik iraungita dauden emakidak berritu beharko direla, hilerriko alde zaharrari dagozkionak; horretarako azken eguna abenduaren 31 da. Lehenengo luzapeneko hilobietako emakidak oraindik iraungi gabe daude.
Kapera eta panteoietan egin beharreko lanak "beharrezkoak" dira gorpuak lurperatzen dituzten langileen segurtasuna bermatzeko, "lan ikuskaritzak zehaztuak dituen baldintzak bete daitezen".
Udal jabetzako nitxoa
Egokitzapen lanak egin bitartean, Udalaren hitzetan, aukera eskainiko dute gorpua udal jabetzako nitxo batean sartzeko, baina gorpuak gutxienez bost urte egon beharko luke han, Euskal Autonomia Erkidegook Hilotzen Sanitate-alderdiei buruzko Erregelamenduak arautzen duen eran. Zerga ordenantzan zehaztutako tasa ere ordaindu beharko lukete horretarako interesa duten herritarrek.