Urbiako erromeria egingo da beste urtebetez San Inazio egunean, uztailaren 31n, eta domeka eta jai egunetan egoten den autobus zerbitzua indartu egingo du Oñatiko Udalak egun horretan. Hain zuzen ere, garraiobide hori erabiltzea da gomendioa, Arantzazuko aparkalekua betetzen denean, itxi egingo dute-eta Oñati eta Arantzazu arteko errepidea.
Ohiko ibilgailuarekin batera 55 plazako beste ibilgailu handi jarriko dute egun horretan eta irteerak ordu erdiro izango dira. Oñatin, geltoki bakarra izango du zerbitzuak: Arantzazuko Ama kaleko 18aren parean. Autobus txikia Arrikrutzeko aparkalekura sartuko da 10:30etan eta 14:00etan, bidaiariren batek hala eskatzen badu, eta handiak, Oñati-Arantzazu-Oñati bidea beteko du. Arantzazura igotzeko lehen autobusa 07:30ean abiatuko da eta azkena, 19:00etan irtengo da Arantzazutik.
