Hogeita seigarrenez antolatu du Abixaran taldeak Torreauzoko krosa, eta aurten ere ehunka parte-hartzaile egongo dira; izan ere, dagoeneko 242 korrikalarik eman dute izena –75 dira emakumezkoak; egueneko datua–. Dortsalak agortu ezean, ekainaren 27ko 22:00ak arte egongo dira salgai, 10 eurotan; gero, prezioa 18 eurora igoko da, ekainaren 29ko 09:00ak arte.
Taldeka izena emateko aukera
Herri-lasterketa da Torreauzoko krosa, eta, izaera hori nabarmentzeko, taldeka jokatzeko aukera eskaintzen dute antolatzaileek. Dagoeneko 27 taldek eman dute izena, eta lagunartean parte-hartzea sustatzea da antolatzaileen helburua: "Torreauzoko krosa berezi egiten duena da lasterketa ondorengo zozketan banakako sariak eta taldeentzako opariak banatzea". Gainera, "kirolaren balio integratzailea" aldarrikatzea ere bada Abixaranekoen asmoa, eta aurtengo lasterketan "Joillet aulkian eramango dituzten bost gaztek eta laguntzaile taldek" parte hartuko dutela jakinarazi dute.