700 ikasle elkartuta egingo dute Eskola Kiroleko azken jaia

Eskola kiroleko urte bukaerako jaia egingo dute bihar Oñatin, 09:30ean hasita. 700 ikasle inguru elkartuko dira, eta Lehen Hezkuntzako ikasleek izango dute ekimen horretan parte hartzeko aukera. Lehengo eta bigarren mailetakoek plazako frontoian hainbat jolas egingo dituzte; hirugarren eta laugarren mailetakoek ginkana bat egingo dute, Herriko Plazan eta unibertsitatean banatuta; eta bosgarren eta seigarren mailetakoek orientazio-proba bat eta errugbi-saio bat egingo dituzte, San Martingo belardian eta Larrañako futbol zelaian, hurrenez hurren, batzuek, eta Santa Lutzian eta Azkoagainen beste batzuek.