Ohitura bihurtu da Asentzioko ermitan auzokide beteranoenak omentzea, eta Iziargoikoa baserriko Bixente eta Jose Mari Kortabarria anaiek jaso dute makila aurtengo Asentzio jaietan. Meza izan dute goizean, ostean aurreskua dantzatu die bi omenduei, eta auzokideek bertso bat ere abestu die. Gertukoenen eskutik oroigarriak jaso, talde argazkia atera eta elkartera joan dira goiza borobiltzera. Jatekoa eta edatekoa prest zuten han, eta elkartea bete egin da Iziargoikoko Kortabarria anaiei egindako omenaldiarekin bukatzeko.
Honako hau da auzokideek abestu dieten bertsoa:
Iziargoikoan jaio
bi medikuren parean
Bixente ta Jose Mari
bataiatuak legean
baserri mundu horretan
egunero lanean
Haitzondotik Zegamara
behorren aldamenean.
Belarria eta bista
ehiztarien senean...
A zer nolako parea
oraindik sasoi onean.
Jaso gure esker onak
Auzoaren izenean
Batera segi zazue
bizitza honen bidean.