Hogeigarrenez jokatu dute gaur Aloñako Igoera, eta bailarako bi ordezkari nagusitu dira infernuan: Aitor Ajuria gatzagarra (2:02:36) eta Oihana Kortazar elgetarra (2:37:47). Lasterketa hasieratik erritmo handia ezarri dute biek, eta bigarrenarekiko tarte handia hartuta, bakarrik egin dute korrika ibilbide guztian zehar. Batak zein besteak, Aloñako Igoerako hirugarren txapela irabazi dute –bigarrena jarraian Kortazarrentzat–, eta "oso pozik" agertu dira lasterketaren amaieran, lortutako emaitzagatik.
Hasieratik estutzen
Iazko estrategia berbera erabili du aurten Ajuriak; hain zuzen ere, lasterketa hasieratik haren erritmoa ezarri eta gainontzeko lasterkarietatik ihes egitea, eta balio izan dio. Urtiagainera bakar-bakarrik iritsi da gatzagarra, eta gauza bera egin du Aloñako tontorrean, bigarren sailkatu den Oier Zubeldiari minutu bat baino gehiago aterata. Eguraldia, gainera, alde izan du Ajuriak; izan ere, behelainoagatik, atzetik zihoazen Zubeldiak eta Asier Azkarate arrasatearrak guztiz galduta izan dute gatzagarraren erreferentzia. Lasterketaren bukaeran, hurrengo korrikalariek osatu dute gizonezkoen podiuma:
- Aitor Ajuria (2:02:36).
- Oier Zubeldia (2:04:53).
- Asier Azkarate (2:08:46).
Kortazar nagusi eta Uribarrik podiuma
Iaz deabruarekin zeharkatu zuen Helmuga Kortazarrek, eta aurten ere nagusi izan da infernuan. Lasterketa hasieratik utzi ditu atzean podiumeko lehian egon zitezkeen korrikalariak, eta haren lasterketa egitera atera da elgetarra. "Sentsazio onak" izan ditu goranzkoan, baina "lokatz artean ere gustura" ibili dela onartu du. Aurten ez du izan iazko lasterketan Lide Urrestarazurekin izan zuen lehia, baina, hala ere, "gozatu" egin duela adierazi du Kortazarrek. Elgetarrarena, baina, ez da izan emakumezkoen lasterketako berri on bakarra; izan ere, Ainara Uribarri oñatiarrak hirugarren zeharkatu du helmuga. Bigarren postua eskura izan du lasterketa osoan zehar, baina jaitsierako zatian hobeto moldatu da Oihana Zubillaga. Hurrengo korrikalariek osatu dute emakumezkoen podiuma:
- Oihana Kortazar (2:37:47).
- Oihana Zubillaga (2:42:42).
- Ainara Uribarri (2:43:40).
Zubillaga, Kortazar eta Uribarri, Aloñako Igoerako helmugan. Irudia: Imanol Soriano.
Aurrerantzean, '13' dortsalik ez
Antolatzaileek adierazi dutenez, "berezia, baina oso gogorra" izan da Aloñako Igoeraren XX. edizioa antolatzea; izan ere, urte hasieran zendu zen antolakuntzako kide izan den Asier Sagastizabal Sagas. Hala, omenaldia egin diote sari banaketan, eta jakinarazi dute Sagas-entzat horren kuttuna zen 13 zenbakidun dortsala erretiratu egingo dutela eta, hortaz, aurrerantzean ez duela inork jantziko dortsal hori.
Bihar Harmailatik saioan eskainiko du Goiena telebistak lasterketak emandako guztia.
