Urtero bezala, literaturarekin lotutako askotariko ekintzak antolatu ditu aurten ere apirilerako Udal liburutegiak, Haur Liburuaren Eguna eta Liburuaren Eguna ospatzeko.
Tertulixan saioak
Martitzen arratsaldean Unai Elorriaga idazlea izan zen Idazlearekin Tertulixan saioan, eta haren Francesco Pasqualeren bosgarren arima liburua izan zuten berbagai, Itziar Ugartek dinamizatuta. Arantzazu Ibarrondo liburuzainak adierazi du saio horrekin emango diotela ikasturte honetako Tertulixan euskarazko saioei bukaera eta balorazio positiboa egin du: "Guztira, bost irakurle talde ditugu finkatuta, oso osasuntsu daudenak, lau nagusienak eta umeenarekin aurten hasi gara, eta etortzen direnak oso pozik irteten dira. Gainera, martitzenean egin genuen moduko saioak, idazleak gonbidatzen ditugunak, herritar guztiei irekitakoak izaten dira; edozein etor daiteke, ez bakarrik irakurle talde horretan dabiltzanak, eta aukera ona izaten da idazlea eta bere lanak ezagutzeko eta baita irakurle talde baten dinamika ezagutzeko ere".
Hain justu ere, hilaren 8an, martitzena, izango da era horretako beste literatur saio bat. Kasu horretan, Komikia Tertulixan saioa izango da eta Los enciclopedistas komikia izango dute berbagai. Bertan izango dira lan horren Jose Antonio Perez Ledo idazle bilbotarra eta Barakaldoko Alex Orbe ilustratzailea. Herritarrendako saio irekia izango da liburutegian bertan, 18:30ean.
Egun bat lehenago, hilaren 7an, ohiko idazketa lantegia egingo dute Joxe Mari Iturralde dinamizatzailearekin liburutegian, 18:00etan.
Haur eta gaztetxoendako saioak
2 eta 3 urte arteko haurtxoendako Oinatzak antzerkia izan da gaur eta ondorengo egunetan nagusiagoek izango dute zertaz gozatu. Izan ere, hilaren 10ean, eguenean, manga tailerra izango da 9 urtetik aurrerako neska-mutikoendako. Mangaren sekretuak ikasteko tailer azkarra izango da hori eta manga marrazteko gutxieneko jakintzak erakutsiko ditu Gurutze izenarekin ezaguna den artistak. Lantegi azkar horretan ikasitakoa praktikatu eta denboraz nork bere manga estiloa garatu ahal izango du, bertan jasotako informazioaren ostean. Aurrez izena eman behar da liburutegian edo 688 732 826 zenbakian.
Hilaren 10ean bertan, Ostegun Kontalariak saioa izango da 4-5 urte arteko haurrendako. Izaskun Mujikaren eskutik izango da ipuin kontaketa haur liburutegian, 18:00etan. Eta gonbidapenak eskatu beharko dira aurrez liburutegian edo 688 732 826 telefono zenbakian.
Markos Zapiainekin solasaldia
Hilabeteko azken ekintza hilaren 29an izango da; Txillardegi hizkuntzalari liburuaren idazle den Markos Zapiainekin solasaldia izango da zinema aretoan, 19:00etan, herritar guztiendako. Horren harira, hau azaldu du Ibarrondok: "Uste dut gaur egun jendeak badakiela Txillardegik hizkuntzarekiko zein harreman zeukan, baina liburu horretan azpimarratzen da alderdi hori Txillardegirena; asko gelditu izan gara alderdi politikoarekin, eta euskararen alde egindako lanari balioa eman nahi dio idazleak. Oñatirekin, gainera, harreman estua dauka Txillardegik; Arantzazun plaka bat jarrita dauka, Enparanza da bere bigarren abizena –ama oñatiarra zen–. Eta saio horrek uste dugu beste publiko mota bat erakarriko duela". Ibarrondok herritar guztiak gonbidatu ditu parte hartzera.
