Elkarteen betebehar legal eta fiskalak: administrazio eta kontabilitate oinarriak izeneko ikastaroa antolatu du Oñatiko Udaleko Partaidetza eta Garapen Komunitarioko sailak herriko elkarteendako.
Irabazi-asmorik gabeko elkarteen lege eta kontabilitate esparrua ulertu eta integratzeko eta administrazio eta kontabilitate-jardunbide egokiak ezagutzeko eta aplikatzeko ikastaroa da. Saioak parte-hartzailea izango dira, eta parte- hartzaileek beren kasuak partekatu eta eguneroko kudeaketa erraztuko duten trikimailuak, tresnak eta programak eskuratu ahal izango dituzte.
Bi saioko ikastaroa izango da: apirilaren 28an eta maiatzaren 5ean, 18:00etatik 20:00etara, Eltziako hirugarren solairuan.
Ikastaroan parte hartzeko baldintzak dira:
- Legez eratutako elkartea izatea eta egoitza nagusia edo legez eratutako ordezkaritza (egoitza soziala) Oñatiko udalerrian izatea.
- Plazak mugatuak direnez, izena emandako hurrenkeran gordeko dira.
- Elkarte bakoitzeko, gehienez 2 kide.
- Izena eman duten pertsonen kopurua ez bada heltzen ikastaroa emateko ezarritako gutxieneko ikasle-kopurura, ez da ikastarorik egingo.
- Ordenagailua beharko da. Norbaitek ez badauka, Udalarekin jar daiteke harremanetan eta bideratuko diote bat.
