Euskal Pirineora egingo du apirileko irteera Aloña Mendiko mendi sailak. Hilaren 13an izango da eta Zilbeti herritik hasiko dute ibilbidea. "Status berezia duten Quinto Real eta Aldude zonaldetatik ibiliko gara. Adi mendia izango da punturik altuena. Handik, jaitsiera Behe Nafarroako Urepel herritxoraino, Xalbador bertsolariaren herria. Inguru oso interesgarria. Ez du zailtasunik".
Guztira 14,5 kilometroko luzera duen ibilbidea izango da, 5-6 ordu ingurutan egiteko modukoa, 830 metroko desnibelarekin eta zailtasunik gabea.
Apirilaren 13an izango da. 07:00etan aterako dira postetxe pareko autobus geltokitik. Autobusa dute antolatuta eta plazak bete beste toki egongo da –40 leku–. Izena hilaren 3tik 10era bitartean eman behar da: alonamendi.mendi@gmail.com. Hamar euro ordaindu beharko dira autobusean.
