ELAko zortzi kidek eta LABeko bostek osatzen duten Natra Oñatiko enpresa batzordeak mobilizazioak deitu ditu datozen egunetarako. Azaldu dutenez enpresan 24 urte zeramatzan emakumezko langile baten kaleratzea da horretarako arrazoia, enpresa batzordearen iritziz kaleratzeko enpresak emandako argudioek “ez dutelako bat egiten errealitatearekin".
Hori horrela, mobilizazioekin “lekuz kanpoko” kaleratzea salatu gura dute, baita , "langile guztien elkartasuna" adierazi ere. Enpresa batzordeak bidalitako oharrean gaineratu dute mobilizazioetarako deialdiak langileek egindako asanbladaren "babes osoa" dutela.
Deitu dituzten mobilizazioak martxoaren 27an (eguena) eta 28an (egubakoitza) enpresaren parean egingo dituzten lanuzteak izango dira. Eguenean 10:00etatik 11:00etara eta 16:00etatik 17:00etara, egingo dituzte lanuzteak eta egubakoitzean, goizeko 05:00etatik 06:00ak bitartean .
