Sancti Spiritus unibertsitatea birgaitu eta Turismo Bulegoa egokitzeko proiektuaren idazketa eta lanen zuzendaritza esleipenera atera du Foru Aldundiak.
Proiektua idazteko lau hilabeteko epea zehaztu dute, eta, lanak esleitu ondoren, horiek hamabi hilabetean egitea aurreikusten dute; izan ere, orain zabaldu den lizitazioan lanen zuzendaritza jaso da eta urtebeteko epea finkatu da.
Esleipenerako gehienezko aurrekontua 547.461 eurotan mugatu du Foru Aldundiko Mugikortasun, Turismo eta Lurralde Antolaketarako Departamentuak, eta proposamenak apirilaren 4ra bitartean aurkeztu ahal izango dira.
Unibertsitatea zaharberritu eta Turismo Bulegoa bertan egokitzeko lanetarako ia hiru milioi euroko dirulaguntza lortu zen Next Generation funtsetik.
