Azaroan egin zuten aurkezpenetik hona, taldeak hainbat ekintza aurrera eraman ditu, eta ekitaldiak bide horretan beste urrats garrantzitsu bat markatu du gaurko ekitaldiarekin. Ekimenaren helburuen artean, taldea kalean ezagutaraztea, taldekide berriaren aurkezpena eta tresnak probatzeko aukera eskaintzea izan da. Hori horrela, herritarrek handbike-ak eta gurpildun aulkiak probatzeko aukera izan dute, haurrendako margotzeko txokoa izan da, eta, bazkide egiteko aukera ere jarri dute plazan, besteak beste.
'Gar' maskotaren aurkezpena
Bizi Hadi proiektuko kideek Gar maskota ere aurkeztu dute ekitaldian. Ekitaldi, hitzaldi eta txapelketetan izango den maskota herritarren aurrean aurkeztu dute. "Aharia da gure maskota; bere esanahiarekin. Aharia atzeraka joaten da, soilik, indarra hartzeko, eta gero aurrera egiten du, eta guk ere berdin egiten dugu. Garra sutan jarri behar da, eta hemen jendeak horren beharra du aurrera jarraitzeko", azaldu du Aitor Rementeriak, Bizi Hadi proiektuko presidenteak.
