Herrialde ezberdinetako bertsolari gazteei bertsotan aritzeko plazak eskaintzeko helburuz, Ipar Euskal Herrian antolatzen den sariketa da Bertsuxurla. Osotara, 12 bertsolarik hartu dute parte aurtengo edizioan, tartean hiru debagoiendar: Danel Herrarte eta Sabin Abarrategi aramaioarrak eta Lide Arregi oñatiarrak. Azken honek bihar, egubakoitza, 19:00etan Hazparneko Xuriatea ostatuan jokatuko den finalean kantatuko du.
Binaka jokatzen den sariketa da Bertsuxurla. Oñatiarrak Kattin Madariaga arantzarrarekin batera osatuko du bikotea finalean. Aurrean Irantzu Idoate hazparnetarrak eta Araitz Katarain mallabiarrak osatutako bikotea izango dute.
Esperientzia polita
Bertsuxurlan kantatzea oso esperientzia polita izan dela adierazi du Arregik. Otsailaren 14an izan zuen kanporaketa eta saioko giroa nabarmendu nahi izan du: "Oso ondo joan zen, giro polita zegoen. Baionako Epaiska elkartean izan zen eta bertako komunitatearen babesarekin giro ezin hobea sortu zen". Saioa bera ere txukun joan zela dio oñatiarrak: "Hasieran zortziko txiki eta zortziko handi bat egin genituen eta ostean zenbait jolas. Oso saio polita izan zen nire ustetan. Irabazleak publikoari banatutako koloretako fitxa batzuen bidez erabaki ziren".
Etxahun Azkarraga etxalartarrarekin osatu zuen taldea Arregik. Josu Txoperena-Haizea Telleria bikoteak eskuratu zuen garaipena kanporaketan, baina, hauek ezin zirenez finalera bertaratu, antolatzaileek saio ona egin zuten bi bertsolarirekin talde berri bat osatzea erabaki zuten, tartean, Arregi.
