Burrunda Faktoriak antolatuta, Alaia Galtzagorria mitoen bidaian ikuskizuna egingo du Ostomila Txotxongilo taldeak domekan, Antixeneko gaztetxean, 17:00etan hasita.
Haurrei bideratutako ikuskizuna izango da emanaldia, non Alaia Galtzagorriak Txerrentxu deabrutxoak lapurtutako altxorra berreskuratu beharko duen, publikoaren laguntzarekin, Euskal Herriko mitoetan barrena bidaiatuta. Burrundako kide Eneko Ibabek garrantzitsutzat jotzen du haurrei ere eskaintza kulturala zabaltzea: "Haurrendako gauzak antolatzea garrantzitsua dela uste dugu, haiei kultura gerturatu ahal izateko; bereziki, euskal kultura eta euskaraz denean".
Astean jarri dituzte azken hamar sarrerak Mizke gozoki-dendan salgai, eta denak saltzea espero dute antolatzaileek. Pozik daude herriak egindako harrerarekin: "Oso pozik gaude, eta hurrengo denboraldira begira haurrendako eskaintza berri bat eskaintzeko prest gaude".
