Hainbat debagoiendar izan dira aurtengo Goya sarietarako hautagaien artean. Batetik, Aitor Arregiren eta Jon Garañoren Marco bost saritarako hautagaien artean zegoen, eta horietatik bi buruhaundi poltsikoratu dituzte. Esan moduan, Eduard Fernandezendako izan da protagonista onenaren saria –laugarren Goya saria aktore kataluniarrarendako–, eta bigarren Goya saria izan da makillaje eta ile-apainketa onenarengatik.
Bestalde, La Infiltrada pelikulak 13 izendapen zituen, tartean produkzio-zuzendari onenaren kategorian Axier Perez Serrano oñatiarra zegoen hautagaien artean, eta filmak berak bi Goya irabazi baditu ere, produkzio-zuzendari onenaren saria El 47 filmarendako izan da. Eta, Bea Asurmendi abeslariak ere seguru sari banaketa ekitaldia gertutik jarraitu duela, jatorrizko abesti onenaren sarirako Buffalo Kid filmeko Show me abestia egon delako hautagaien artean. Baina, saria C. Tangana eta Yeray Cortesendako izan da, Los almendros abestiagatik.
