Partiduaren lehen minutuetan oreka izan da nagusi berdegunean. Hala ere, seigarren minutuan
Gexan Anduagak aukera bikaina izan du lehen gola sartzeko, baina ez du Agirre
atezaina gainditzen asmatu. Hortik aurrera zelaia erdiko jokoa nagusitu da, eta
zumarragarrek baloiaren jabetza handiagoa izan du, baina ez dute gol aukera garbirik
izan.
25. minutuan Joseba Larreak jaurtiketa ederra egin du arearen kanpotik, Agirre atezainak baloia alderatu du, eta Julen Zelaiak aprobetxatu du alderaketa hori lehen gola lortzeko. Bi minutu beranduago Gexan Anduagak egin du bigarrena; eta atsedenaldiaren aurretik, 43. minutuan, partidua erabakita utzi dute etxekoek. Oñatiarrek kontraeraso bikaina antolatu dute: Julen Zelaiak baloia luze bidali du, Gexan Anduagak zelaiaren beste aldetik zihoan Auritz Larreari eman dio baloia, eta honek jaurtiketa zehatz batekin 3-0koa lortu du.
Bigarrenaren hasieran beste bi gol
Bigarren zatia lehenengo bukatu den bide beretik hasi da. Alegia, Aloñaren gol batekin. Lehen minutua bete aurretik, aurretik, Joseba Larreak baloia lapurtu du area ertzean, eta atezaina gainditu du jaurtiketa eder batekin. Segituan, 49. minutuan, etorri da bosgarrena: Joseba Larreak erdiraketa bikaina egin du, Iñigo Guridik atzelariei aurrea hartu eta ukitu bikain batekin sartu du gola. Partida erabakita gelditu da une horretan. Hala ere, etxekoek seigarrena ere egin dute: Auritz Larreak luze bidalitako baloia hartu du, atezainaren aurrera iritsi da, eta bigarren aldiz gainditu du.
Urolak ez da arerio izan. Aloñak sei gol sartu ditu, baina, horietako batzuetan, zumarragarren atzeko lerroak akats batzuk egin ditu. "Guretzat oso inportanteak dira gaurko puntuak. Are gehiago, aurreko astean irabazi ostean. Bigarren itzulia horrela hasi gura genuen. Hurrengo erronka izango da etxetik kanpora denboraldirako lehen garaipena lortzea", esan du Auritz Larreak.
Bergara eta Mondra
Bergarak eta Mondrak ere Ohorezko Erregional Mailako bigarren itzulia hasi dute asteburuan. Mahoneroek mendean hartu dute Beti Gazte (0-3) eta arrasatearrek galdu egin dute Oiartzunen (3-1).
Kategoria berean, baina emakumezkoen futbolean, Bergarak bina berdindu du Ostadarren kontra.
