Otsaileko lehenengo kontzertua joko du Esanezin musika taldeak gaztelekuan, eta dagoeneko salgai daude hura ikusteko sarrerak, 8 eurotan, Oñatiko Udalaren webgunean: oñati.eus.
Ianire Aranzabe altzagarraren proiektua da Esanezin, eta, haren musika ibilbidean bakarkako emanaldiak egiten hasi bazen ere, laukote bat osatzera igaro zen, Arri Iraetarekin, Iñigo Asensiorekin eta Imanol Rubiorekin batera. 2023. urtean, hamar kantuz osatutako lan luzea kaleratu zuen Esanezin taldeak –euren bigarren lan luzea–, Erretratu bat izenpean.
