Azken orduko aldaketa baten ondorioz, etxean, Oñatin jokatu du Madalen Etxegaraik Emakumezkoen Binakako Txapelketako 2025eko lehen partidua. Izan ere gaur Oñatik hartu dituen bi norgehiagokak Eskoriatzan ziren jokatzekoak, baina bertako pilotalekuan pilatutako hezetasunak lekualdatzea ekarri du.
B multzoko partiduak izan dira gaur Oñatik hartu dituen biak. Etxegaraik eta Arrillagak osatutako bikote gorriak urdinez jantzitako Arraiza eta Gaminde izan ditu aurrean eta lehen tantoa gorriena izan arren, urdinek aurrea hartu eta apurka-apurka markagailuko aldea handitzen joan dira. Hala, 14-22 izan da azken emaitza urdinen alde.
Finalaurrekoetarako, itxaron egin behar
“Hasieran nahiko parekatuta ibili gara. Ez dut uste gaizki jokatu dugunik, baina eurak tantoak egiten joan dira eta guk ez dugu jakin tantoak ixten”, azaldu du Etxegaraik partiduaren ostean. Gaur punturik ezin lortuta, finalaurrekoetara heltzeko itxaron egin Etxegaraik eta Arraizak. “Aurreko partiduan puntu bat lortu genuen, eta gaur ere irabazi izan bagenu finalaurrekoetan geundeke. Hurrengo jardunaldian argituko da zer gertatuko den ”, azaldu du oñatiarrak.
B multzoko bigarren partiduan, aldiz, Uriarte eta Capellanek 11-22 galdu dute Salsamendi eta Erasunen kontra. Gauzak horrela, hauxe da gaurko jardunaldiaren ostean, multzoko sailkapena:
1. Arraiza-Gaminde 2 puntu
2. Etxegarai-Arrillaga 1 puntu
3. Salsamendi-Erasun 1 puntu
4. Uriarte-Capellan 0 puntu
