Fantasiaren munduan murgildu da gaur Oñatiko Musika Banda, kontzertua egin baitu. Aitor Biain-Bidarte zuzendariaren hitzetan, kanten bitartez, helburu izan dute "ametsen munduan zehar bidaiatzea hainbat pelikuletan barrena: Brave izeneko neskaren Irlandako doinuetatik, Kolonbiako doinuetara Mirabel izeneko neska urduritik jarraituz, edota Avatar bezalako pelikuletako melodiak eskainiz. Pixar munduko pelikulak dira asko, eta denetan, protagonistek, amets bat dute. Ametsen mundu horri jarri dio melodia bandak".
Horretarako, zazpi obra eskaini dituzte: Disney Fantasy, Highlights from Brave, Titanic, Selections from UP, Encanto, Avatar eta Pirates of the Caribbean Medley –bideoan ikus-entzun daitekeena–. Guztira, ordubete inguruko kontzertua izan da.
Emanaldi honetan, gainera, Oñatiko Musika Bandaren lehen kontzertua izan du Gillen Biain klarinete-joleak; txalo zaparrada jaso du kontzertuaren hasieran.
Gillen Biain musikaria, zutik, kontzertuaren hasieran. Irudia: Goiena.
