Atzo arratsaldean, Oñatiko Santa Ana antzokia magiaren etxe bihurtu zen, herrian egiten den lehen magia galarekin. Potx magoa izan zen ikuskizuna gidatzeko arduraduna, eta Euskal Herriko bost mago gaztek beren talentua erakutsi zuten ikusleen aurrean: Azpeitiko Iago Azkue, Usurbilgo Oier Agirresarobe (14 urteko mago gazteena), Oreretako Maria Arandia, Markinako Oier Jurado, eta Potx magoa bera.
Ikuskizunean, trikimailu ikusgarriak eta irudimenez beteriko emanaldiak izan ziren protagonista. Potx magoak azpimarratu zuen ekitaldi honen helburua euskal magoen arteko sareak sortzea eta euskarazko magiaren presentzia indartzea dela. "Euskal Herrian egiten da magia, baina euskal magia da?", galdera luzatu zuen gidariak. Hizkuntzan ardaztutako magia bat derrigorra dela nabarmendu zuen Potxek, "ez dago euskal herrian euskaraz funtzionatzen duen magia elkarterik", gaineratuz. Horregatik, "ezinbestekoa" ikusten du etorkizunera begira magiak ere euskara ardatz izatea.
Giro berezia eta harrera beroa izan ziren nagusi, eta antolatzaileek espero dute horrelako ekitaldiek euskal magiaren kultura sustatzen jarraituko dutela.
