Bi hamarkada igaro dira Ganbara Kantu Eskola sortu zenetik, eta hainbat izan dira, urte horietan guztietan, kantuan egiten ikasteko Ganbaran izena eman duten neska-mutikoak. Bada, hogei urtean egindako ibilbidea ekarriko dute gogora bihar, 19:00etan hasita, Santa Ana antzokian egingo duten gala-kontzertu batekin. Izan ere, Euskal Herrian zein Euskal Herritik kanpo emandako kontzertuez gain, antzoki handietan taularatu dituzten musikalak eta bi diskoren grabaketak ere egin dituzte, eta, proiektu horiei guztiei balioa emateko eta koruak egin duen ibilbidearen errepasoa egiteko tartea ere izango dute gala-kontzertuan. Sarrerak salgai daude, 5 eurotan, oñati.eus webgunean eta Txokolateixan.
Kide ohiak ere gonbidatuta
Koruak egin duen hogei urteko ibilbidean Ganbara Kantu Eskolaren parte izan diren baina dagoeneko ez diren kideak ere gonbidatu dituzte ospakizun ekitaldira. Hori kontuan hartuta, gaur egungo kideek kide ohiekin batera bi entsegu egin dituzte; izan ere, hainbat belaunaldi elkartuko dira Santa Anako ekitaldian, eta duela bi hamarkada euren Ganbarako ibilbidea hasi zutenek koruan hasi berri diren gaztetxoenekin partekatuko dute Santa Ana antzokiko oholtza.
