Euskaraldiko herri batzordeak izena eman du Euskaraldian parte hartzeko eta Udalak eta Topaguneak lankidetza-hitzarmena egingo dute dinamizatzaile bat kontratatzeko. Aste honetan atera da deialdia eta abenduaren 8ra bitartean bidali beharko dituzte curriculum-ak interesatuek Lansarean webguneko atariaren bitartez edo jon@topagunea.eus helbidera.
Urtarriletik ekainera, bost hilabeteko kontratua egingo zaio hautatuari, egunean lau orduko jardunean. Herritarrei eta herriko eragileei Euskaraldia aurkeztea, entitateekin lanketa planifikatzea, belarriprest eta ahobizi dinamikak aktibatzea, ekimenak garatzea eta antolatzen diren ekintzak koordinatzea izango dira egin beharretako lan batzuk. Era berean, eskatuko zaio, besteak beste, euskara maila egokia izatea, Oñati eta inguruak ezagutzea, kudeatzeko gaitasuna izatea, lanerako autonomia handia erakustea eta euskaltzalea izatea eta euskalgintza ezagutzea.
