Donostiako Ilunben egingo da abenduaren 14an Gipuzkoako Bertsolari Txapelketako finala, 17:00etan. Oñatiko Txinparta bertso eskolak antolatuta, autobusa egongo da Oñatitik hara joateko; 14:30 irtengo da postetxe pareko geltokitik eta saioa bukatu ahalaz bat izango da buelta. Txartelak salgai daude Txokolateixan, hamar eurotan.
Txapelketa final aurreko saioetara iritsita dago. Joan den domekan, hilak 17, jokatu zen finalaurrekoetako lehen saioa Oiartzunen; Beñat Gaztelumendi zuzenean sailkatu zen finalerako. Bigarrena datorren domekan, azaroak 24, izango da Zarautzen eta hirugarren eta azken finalaurrekoa abenduaren 1ean jokatuko dute Arrasaten, Uarkape frontoian. Hango saioan lehiatuko da Maider Arregi Markuleta oñatiarra. Agin Laburu Rezola, Andoni Rekondo Izagirre, Eñaut Martikorena Lizaso, Iñigo Mantzizidor Larrañaga 'Mantxi' eta Oihana Iguaran Barandiaran izango dira beste bost bertsolariak.
