Postetxe ondoan dagoen trenaren lurrun-lokomotoran zaharberritze-lanak egingo ditu Udalak, hondatzen ari dela ikusita. Bi fasetan egitea aurreikusten du: lehenengoan, apurtutako txapak konpondu edo ordezkatu egingo dituzte; eta bigarrenean, margotzea aurreikusten dute, jatorrian zituen kolore beltza eta gorria mantenduta.
Datorren astean gura dituzte lanak hasi, eta, lehen fasekoen barruan, lokomotoraren egitura metalikoan egingo dira. Hain zuen ere, gidariaren kabinaren zatiak, ikaztegikoak, ur-biltegiak eta ke-kaxaren zatiak. Tximinia konpondu egingo dute eta ur-biltegiaren barrena, hodiak eta kabinaren zorua berregin egingo dituzte. Era berean, zur matxinbratuzko estalki berria egingo diote eta gidatzeko kabina muntatuko. Herreria Mitxel enpresak egingo ditu lanak, 18.000 eurotan. Burdinbidearen Euskal Museoko zuzendari Juanjo Olaizolarengana jo du Udalak lanak egiteko. Vasco-Navarro trenbidearen Euskadiko zatia babes bereziko kultura ondare izendatuta dago.
