Liburutegien Nazioarteko Eguna da urriaren 24an eta ospatu gura du eguna aurten ere udal liburutegiak. Uxue Alberdi eta Susanna Martin izan ziren hilaren 15ean Surflaria komikiarekin, adibidez. Gaur, berriz, Idoia Torregarai eta Mirari Martiarena etorriko dira Ztandap umore ikuskizunarekin. 19:00etan izango da, zinema aretoan.
Bestalde, bihar goizean, Aurorita beti polita-ren bisita bereziak egingo dituzte liburutegira lau urteko haur guztiek liburutegia ezagutuz; bide batez Lur Kortaren ipuinak entzungo dituzte. Arratsaldean berriz, 18:00etan, Kontu-kantari ipuin kontaketa izango dute 4-5 urteko bitarteko umeenk Yolanda Arrietarekin. Hitz-jokoak, kontuak eta kantuak, ahozkotasuna, afektuak eta irudimena izango dituzte gidari.
Biharko ospakizun egunari lotuta, udal liburutegiko langileek gogora ekarri gura dute liburutegi bat ez dela soilik liburuz betetako eraikin bat, eta ateak zabalik dituztela sartzeko eta ezagutzeko.
